کالج کا کلرک رشوت لیتے ہوئے گرفتار

ناندیڑ: ۱۹؍جولائی ( نامہ نگار)اوپن یونیورسٹی کے کورس میں داخلہ اور امتحان میں کامیابی کیلئے ۸۰۰؍روپئے لینے والے کالج کے کلرک کو اینٹی کرپشن نے رنگے ہاتھوں پکڑ لیا ۔ پولس پریس نوٹ کے مطابق ایک نوجوان نے اینٹی کرپشن میں شکایت درج کرائی کہ اس کی بہن بارہویں بورڈ امتحان میں ناکام ہوگئی تھی ۔ اس لئے اس نے یشونت راؤ چوہان اوپن یونیورسٹی کے کورس میں داخلے کیلئے سڈکو میں موجود گروگوبند



سنگھ مہاودیالیہ اس کالج میں فارم داخل کیا تھا ۔ وہاں کے کلرک تاتے راؤ قندہار ے نے یونیورسٹی کی فیس بطور چالان ادا کرنے کیلئے کہا تو اس نوجوان نے ۴۵۸؍روپئے بطور چالان ادا کردئیے تھے ۔ بعد میں کلرک نے یونیورسٹی کی کتابیں اور امتحان میں پاس کرنے کیلئے ۸۰۰؍روپئے کا مطالبہ کیا تھا ۔ آج کلرک قندہارے کو ۸۰۰؍روپئے لیتے ہوئے رنگے ہاتھوں پکڑا گیا اور اس کے خلاف سڈکو پولس اسٹیشن میں مقدمہ درج کیاگیا ہے ۔